Sindili m’gulu lonamizira oyimbira zikativuta – Chimkwita

Mphunzitsi wa timu ya Karonga United, Chris Chimkwita wati sali mugulu la a phunzitsi omwe amanamizira oyimbira zikavuta ku timu yake.

Chimkwita wayankhula izi pa bwalo la Silver mu mzinda wa Lilongwe pomwe timu yake yagonja ndizigoli zinayi kwa chimodzi pomwe imakumana ndi Silver Strikers mu mpikisano wa FDH Premiership.

Silver Strikers inapeza zigoli kudzera mwa Lasuli Jali, Innocent Shema, Chinsisi Maonga komaso Charles Chipala pomwe Karonga United inapeza chigoli chopukutira misonzi kudzera mwa Lennox Kiwambe.

Atatha masewera, Chimkwita anavomereza zotsatirazi, ponena kuti timu yake sinachite bwino mmagawo ena mchigawo chachiwiri.

“Mayambidwe athu a chigawo chachiwiri tinatayirira zomwe zinapereka mpata ku Silver Strikers kuti igoletse zigoli,” anatero Chimkwita.

Mphunzitsiyu anayamikira oyimbira pa masewerowa: “Ifeyo ngati aphunzitsi tikuyenera kumavomereza zikavuta. Ine simmodzi mwa aphunzitsi omanamizira oyimbira koma lero ndiwathokoze, anali bwino, timalakwitsa tokha kupatula zitopotopo zina zokhudza masapota.”

Masewerowa akudza patadutsa sabata imodzi Silver Strikers itagonja ndi Karonga United yomweyi mu mpikisano wa Airtel Top 8 koma wothandizira mphunzitsi wa Silver Strikers Mapopa Msukwa wati sikuti kunali kubwezera.

Msukwa wati timu yake inalephera kupeza zigoli mchigawo choyamba kamba koti osewera amasewera mwachipsera mtima koma atawayankhula mchigawo chachiwiri ndipomwe zinthu zinayamba kuyenda bwino.

Zotsatirazi zapangitsa Silver Strikers kuti ikhale yachiwiri pa mndandanda wamatimu mu mpikisanowu pomwe yafanana mapoint (21) ndi Mighty Wanderers yomwe ikutsogola pomwe Karonga United ili pa 13 ndimapoint 9.